Komunikadu Imprensa - Kandidatu Lu Olo sei la sai opozisaun ba governu

FRENTE REVOLUCIONÁRIA DO TIMOR-LESTE INDEPENDENTE
FRETILIN

Komunikadu imprensa
5 de Abril 2007


KANDIDATU LU OLO SEI LA SAI OPOZISAUN BA GOVERNU

Kandidatu ba Prezidente RDTL nian, Francisco Guterres "Lu Olo" hatete
katak núdar Prezidente Repúblika, nia sei la sai opozisaun ba governu
tamba nia hatene kompeténsia Prezidente nian tuir Konstituisaun RDTL
nian.

Lu Olo, kandidatu FRETILIN nian ba Prezidente RDTL hato'o ninia
kompromisu eleitoral, horseik, iha Dili, iha kampu motorcross nian,
iha Manleuana, ba ema rihun ba rahun. Komisaun Jestaun Eleisoens
FRETILIN nian hein halibur ema 12.000, maibé, apoiantes barak hola
inisiativa ho sira nia kbiit rasik, husi fatin bar'barak husi Dili, no
moos Ermera, Liquiçá no Baucau. Hamutuk hotu, ema liu 30.000 maka ba
iha fatin ne'e hodi hato'o sira nia apoiu ba Lu Olo atu sai Prezidente
Repúblika. Reprezentante husi distritu ida-idak hato'o sira nia apoiu
ba kandidadtura Lu Olo nian iha mo'os komísiu ne'e.

Lu Olo hatete katak labele fahe Timor-Leste ba loro sa'e no loro monu.
"Ita hotu rona ne'e katak Loro Monu ne'e hahú fali husi Manatuto mak
mai kotuk. Loro Sae mak ba fali leten. Hau triste hanesan moos
camaradas sira hela iha lona okos. La'os!Timor ne'e ida deit. Ita nia
perbatasan (fronteira) mak ho Indonesia nian; ita labele fera ita nia
rain, ita nia povu; sei hamo'os tiha perbatasan husi Manatuto ne'e
hodi halo povu ida ne'e, ho rai ida ne'e, ida deit"

Kona ba krize, Lu Olo hatete katak krize ne'e mai husi leten ba kraik,
la'os husi povu ki'ik mak halo, la'os FRETILIN mak halo. Lu Olo
hatutan katak balu karik sei saudades tempu CNRT nian "iha ne'ebé
ema ida deit mak komanda, ita hotu hotu ne'e tuir".

Kona ba knaar hanesan Prezidente Repúblika, Lu Olo promete katak nia
sei la sai Prezidente ba FRETILIN deit, maibé, sei sai Prezidente ba
povu tomak no sei halao ninia knaar tuir kompeténsias ne'ebé
Konstituisaun RDTL nian fó ba nia. Nia kritika kandidatus sira seluk
ne'ebé halo promesa eleitoral kona ba kompeténsias parlamentu no
governu nian, la'os Prezidente nian. Lu Olo hatete katak kandidatu
ida hatete katak bainhira nia sai Prezidente Repúblika, nia sei lori
trator 100 mai Maliana. Lu Olo hatutan katak agrikultura ne'e
kompeténsia governu nian, la'os Prezidente Repúblika nian. Ida ne'e
hatudu katak balu sei dauk hatene Konstituisaun. Tamba kandidatu
sira seluk kahor kompeténsia Prezidente nian ho fali órgauns sira
seluk nian, Lu Olo hatutan: "Sira ne'e maka ba Prezidente da
Repúblika, aban bai rua sei iha nafatin konflitu tamba la hatene uza
sira ninia kompeténsia atu sai Prezidente da Repúblika".

Tamba ema barak tebe-tebes mak tuir komísiu Lu-Olo nian, iha Dili no
iha distritus sira seluk, ida ne'e hatudu katak povu fiar lideransa
FRETILIN nian, FRETILIN iha abut metin iha Timor-Leste tomak no iha
kapasidade ba mobiliza no organiza povu maubere atu hasoru nafatin
dezafius oi'oin. Molok kampaña eleisoens prezidensiais hahú, ema balu
mehi katak sei iha segunda volta tamba Lu Olo sei la hetan 51% votos.
Ba ida ne'e, lideransa FRETILIN nian, husi Sekretáriu Jeral, dehan
dala barak ona katak ema lalika mehi ta'an ona. Lu Olo sei manan ho
70% votus eleitoradu nian iha 9 de Abril 2007. Sei la iha segunda
volta sé eleisaun ne'e justa no transparente.



Atu hetan informasaun ruma karik bele kontaktu:

José Manuel Fernandes (representante ofisial ba eleisaun ba Francisco
Guterres Lu Olo):

(+670) 734 2174 (Dili)

Harold Moucho (asistente politiku ba Lu Olo) (670) 723 0048

Arsenio Bano: (+670) 733 9416 (Dili)

Filomeno Aleixo: (+670) 724 3460 (Dili)