Komunikadu Imprensa - FRETILIN kondena Xanana ninian abuzu poder

FRENTE REVOLUCIONÁRIA DO TIMOR-LESTE INDEPENDENTE
FRETILIN

Komunikadu imprensa
5 April 2007

Fretilin kondena Xanana ninian abuzu poder

Partido istoriku no partidu maioritariu Timor-Leste nian, Fretilin,
ohin akusa Presidente Xanana Gusmao lori ninia estatutu nudar xefe
estado atu nterfere iha eleisoens prezidensiais nebe atu eleje
prezidenti foun.

Membro Komite Sentral no Komisaun Politika Nasional Fretilin nian,
Filomeno Aleixo, hatete katak Prezidente Gusmao sai iha reportagem
televizaun nebe hatudu katak nia participa iha komisio Jose
Ramos-Horta nian, horseik iha estadio Dili.

"Lolos Prezidenti Republika tenki buka sai nudar ema ida mak
independente no labele fo apoio ba kandidatu ida nee ka ida neeba.
Hahalok ida ne'e hanesan abuzu ba poder Prezidente nian." dehan
Aleixo.

Nudar Xefe Estadu nian, nia iha knaar atu fo sai ezemplu ba promove
eleisoens nebe justu no transparenti. Ninia knaar ida mak atu
reinforsa independensia instituisoens nasaun ida nee nian no tau matan
atu laiha manipulasaun ba eleisoens prezidensiais.

"Prezidenti da Republika laiha direito atu hodi nia pozisaun atu hili
se mak atu tuir mai nudar prezidenti republika"

Fretilin nia kandidatu ba prezidenti mak eis kombatante no Prezident
Parlamento Nasional Francisco Guterres "Lu-Olo".

Aleixo dehan katak komentarios ikus liu mai husi Padre Martinho
Gusmao, Igreja Katolika ninian representante iha Komisaun Nasional
Eleisoens no Komisaun ninian porta voz. Padre Martinho nia
deklarasaun bele prejudika resultadu eleisoens nebe atu realiza iha
segunda feira tuir mai.

Bainhira nia kolia iha Klub Jakarta Pres nian workshop iha Dili
horseik, Padre Martinho Gusmao, nudar direktor komisaun justisa no paz
diokese Baukau nian, hatete katak nia fo'o apoio ba kandidatu
Prezidensial Fernando de Araujo "Lasama".

Nia dehan mos ba partisipantes sira iha workshop katak nia sei hakerek
hela esbosu karta pastoral mak se fo sai iha Loron Paskua iha Domingo
tuir mai, loron ida molok loron bot eleisaun. "Deklarasaun apoio ba
kandidatu ida husi porta-vos CNE nian, ne'e flagranti ida no mos abuzu
poder klaru no seriu ida" Aleixo temik.

Aleixo husu Ierarkia Igreja Katolika atu hasai Padre Martinho nudar
sira nia representante ba Komisaun Nasional Eleisoens no husu komisaun
mos atu hasai nia nudar sira nia porta-vos.

Aleixo dehan katak figura bot Igreja nian barak mak rekonese
nesesidadi ba Igreja atu sai imparsial durante proseso eleitoral ida
nee. Nia dehan mos katak Fretilin hetan relasaun diak ho Igreja
emgeral no mos FRETILIN laiha problema kona ba Igreja ninian
komportamento durante kampanha eleisoens.

"Fretilin se haruka keixa ida ba Komisaun kona ba deklarasaun balun
husi Padre Martinho no ninia falta de imparsialidade politiku duranti
kampanha ida nee" Aleixo hatete.

"Porta voz Komisaun Nasional Eleisoens labele fo sai momos hanesa nee
nia apoio ba kandidatu ida. Nia knaar mak atu tau matan katak komisaun
halo ninian sevisu diak nudar orgaun independenti ida no realiza
eleisoens prezidensiais no legislativas mak livre no justu.

"Deklarasaun ami temi mak ida ikus husi deklarasaun barbarak nebe
Padre Martinho Gusmao hato'o tiha ona ba imprensa nasional no
internasional ho intensaun atu manipula prosesu eleitoral.

"Komisaun Nasional Eleisoens presiza hola asaun ruma atu sira bele
salva sira nia imajem nudar orgaun imparsial ida."


Atu hetan informasaun ruma karik bele kontaktu:
Filomeno Aleixo: (+670) 724 3460 (Dili)
Jose Manuel Fernandes (representante ofisial ba eleisaun ba Francisco
Guterres Lu Olo) (+670) 734 2174 (Dili)
Arsenio Bano: (+670) 723 0023 (Dili)