Komunikadu Imprensa - Ramos Horta, hateten lolós ita nia soin mai ami

FRENTE REVOLUCIONÁRIA DO TIMOR-LESTE INDEPENDENTE

FRETILIN

Komunikadu imprensa
6 Maiu 2007

Ramos Horta, hateten lolós ita nia soin mai ami

José Manuel Fernandes, Reprezentante ofisial ba kandidatu FRETILIN nian, Francisco Guterres “Lu Olo” hateten ohin katak Ramos Horta labele halai bei’beik husi perguntas kona ba nia riku soin.

“José Ramos Horta halai nafatin husi perguntas importantes ne’ebé reprezentantes sosiedade sivil nian no votantes husu ba nia durante kampaña eleitoral hodi nia hateten sai lolós nia riku soin “, Fernandes hateten.

“Lu Olo asina ona deklarasaun ne’ebé hatete momós nia riku soin hotu-hotu, maibé, Ramos Horta lakoi asina deklarasaun no dada a’an husi ida ne’e tamba, tuir ninia hanoin, sei dauk iha lei atu obriga nia atu halo deklarasaun ida ne’e.

“ Fásil tebe-tebes atu hakerek deklarasaun ne’e no devia halo hanesan Lu Olo halo”.

“ Lu Olo deklara ninia riku soin loron sanulu resin rua ona. Karik ninia riku soin barak tebe-tebes no oi’oin mak halo nia presiza loron sanulu resin rua atu hakerek hotu?

“Karik Ramos Horta presisa deit lei atu nia bele sai transparente no onestu ba ita nia povu”.

Fernandes hateten katak manan konfiansa povu nian importante tebe-tebes ba operasoens klandestinas FRETILIN nian durante ita nia luta ba independénsia. “ Tamba ita manan duni povu ninia konfiansa, sira tulun ami no la fa’an ami ba inimigu ne’ebé iha osan no meius militares barak liu ami”. Lu Olo nu’udar ema ida ne’ebe iha tinan 24 laran moris iha resistênsia armada iha relasaun ne’e manan tebes konfiansa absoluta eh rohan laek husi ami nia povu.

Ambiente konfiansa real ne’e hari entre povo- laos tanba estado exige tuir lei.

Hau husu Ramos Horta atu hala’o buat ne’e ho transparente no hahalok ne’ebe nakloke tebes hodi nune’e bele hari presedente ba futuros kandidatos iha ita nia jovem democrasia.

Bainhira ema husu nia kona ba intereses pecuniarios eh riku soin, Ramos Horta hamoris diversaun eh mangame tun mangame sa’e no ko’alia kona fali buat seluk. Agora nia dehan sei asina deklarasaun nia riku soin hirak ne’e karik regula tuir lei, no sei halo auditoria tuir autoridade reguladora ida.

Ida ne’e hatudu momós katak nia lahatene funsaun no natureza deklarasaun riku soin nian. Hau hare deklarasaun riku soin husi rai seluk nian. Atu hateten deit katak auditoria ne’ebe nia hakarak ne’e, hanesan foti rai rahun kari ba ema nia matan.

Fernandes hatete katak iha Australia estado victoria nian “ Deklarasaun riku soin husi oficial senior governo nian la precisa lei reguladora hodi halo audtitoria ba riku soin hirak ne’e.

Dala ida tan Ramos Horta foti rai rahun kari ba povo ida ne’e nia matan hodi bosok tan katak Lu Olo iha vila ida iha Ossu ho osan nia valor USD 700,000. dehan Fernandes.

Ema ruma ba hare karik Lu Olo nia familia nia uma, nia sei konkorda katak buat hirak ne’e bosok dunik e laiha sentido atu hateten uma ne’e nu’udar vila ida.

Uma ne’e seidauk pinta, no nia haris fatin iha liur, kuarto hirak ne’e mos laiha odomatan no nia bo’ot la hanesan Ramos Horta nia Vila ida luxo teb-tebes iha Dili, Fernandes dehan.

Hakarak hatene ta’an informasaun, bele dere arame ba:

Harold Moucho (Lu Olo nia asesor polítiku) (+670) 723 0048 (Dili)
Jose Manuel Fernandes (Lu Olo nia reprezentante ba eleisaun prezidensial) (+670) 734 2174 (Dili)
http://www.luolobapresidente.blogspot.com, http://luolo.blogspot.com, http://www.timortruth.com