Komunikadu Imprensa - TROPA INTERNACIONAL INTERROMPE DALA RUA ONA FRETILIN NINIA KOMISIU

Francisco Guterres “Lu Olo” ba Prezidente “Prezidente husi povu ba povu tomak” Media release Domingo 6 Maio 2007

TROPA INTERNACIONAL INTERROMPE DALA RUA ONA FRETILIN NINIA KOMISIU

Tropa internasional interrompe dala rua ona komisiu FRETILIN nian, ne’bé halao ho dame, iha semana ikus liu kamapaña prezidensial nian.

José Manuel Fernandes, reprezentante kandidatu FRETILIN nian, Francisco Guterres „Lu Olo“hatete ohin katak, ISF – Forsas Internasionais de Estabilizasaun interrompe Lu Olo nia “diálogu ho povu “ iha Dili (5 de Maio) no komísiu ne’ebé halo iha Ainaro, quinta feira kotuk, 3 de Maio.

“ISF nia komportamentu halo apoiantes FRETILIN nian sente tauk“, Fernandes hatete.

“Timor-Leste, estadu soberanu ona, la’os ona rai okupadu ho forsas militares, ne’e duni ISF labele halo ema tauk bainhira sira halibur iha fatin ida ba halao kampaña eleitoral ho dame.

Fernandes hatete katak horseik , operasaun militar ne’ebé ISF halo iha Dili, dehan katak UNPOL mak husu sira ba halao, nebé halo ho helikópterus, tankes funu nian, no tropas hó kilat, halo ema tauk atu ba diálogu iha parke Borja da Costa, iha Farol, Dili.

“ISF no UNPOL la iha direitu ba halo interferénsia iha atividades polítikas povu nian nebé halao tuir lei, nia hateten.

Nia hateten katak Lu Olo ninia adversáriu José Ramos Horta hasae nia a’an hodi hatete katak nia mak amigu diak liu Primeiru Ministru Australia nian, hodi hetan liu apoiu iha eleisaun ne’e.

“Halo ho intensaun ka lae, komportamentu ISF nian kompromete sira ninian kompromisu nebé dehan katak sira forsa neutral iha eleisaun ida ne’e“‘, Fernandes hateten.

“Iha Ainaro, quinta feira kotuk, bainhia Lu Olo koalia namanas hela ho povu, helikópteru ida tu‘‘un besik fatin komísiu nian, no soldadus armadus tama iha povu nia le’et“.

Sekretáriu Jeral FRETILIN nian haruka surat ida ba Komandante Australiano, Brigadeiru Mal Rerden, hodi protesta kontra ISF ninia asaun militar , iha Ainaro.

Alkatiri hakerek : “Ami simu informasaun katak UNPOL maka húsu ISF ba halao operasaun ba fó seguransa ba populasaun . Ami husu, sá seguransa mak imi fó ho komportamentu nebé ema sente fali ameasadu? Ami fiar katak la’os atu fó seguransa ba ami nia membrus no apoiantes. Sira iha razaun atu hanoin katak komportamentu neé hanesan tentativa ida ba dezafia sira nia direitu atu halibur tuir Konstutuisaun hateten.“.

Alkatiri nia karta tatoli tan: “ Hau lalika fó hanoin taan katak eleisaun neé halao iha kondisoens sensíveis tebe-tebes , ne’e duni ISF tenke iha no hatudu neutralidade iha prátika. FRETILIN nia kandidatu kritika ona nia adversáriu tamba tenta uza ISF arbiru deit iha kampanha nee, bainhira nia dehan katak nia husu ISF atu hapara operasoens militares ba kaer Reinado. Ami hein ISF atu mantén neutralidade , no ami sei defende sira nia direitu no dever atu ema labele uza sira ba kampanha politika. Ita nia Konstituisaun klaru kona ba tropa armada katak sira labele halo interferénsia polítika.“

Brigadeiru Rerden hatán fali katak nia sei hakás aán ba oin hodi helikópteru labele tu’un bainhira kandidatu Lu Olo halao hela ninia komisiu“. Nia nega katak tropa la tama iha fatin komisiu nian“

Maibé, video komisiu Ainaro nian hatudu momós katak tropa ho kilat tama iha povu nia le’et .

Fernandes hatete katak FRETILIN simu keixa lor’loron kona ba ISF ninia komportamentu , katak sira provoka no intimida FRETILIN nia apoiantes.

“Ami la konvensidu katak komportamentu ISF nian la iha ligasaun ho apoiu ne’ebé governu australianu fó ba kandidadtu Ramos Horta, Fernandes hateten.

Nia fo hanoin fali dokumentu ida nebé ADF ( Forsa Defesa Australia nian) halo , nebé publika iha revista Bulletin , iha 6 de Junho 2006, nebé hateten: “Australia bele tau matan diak liu ba ninia interese estratégikus, sé Australia bele influénsia ema nebé iha responsabilidade ba hola desizaun iha Timor-Leste“.

Hakarak hatene ta’an informasaun, bele dere arame ba:

Harold Moucho (Lu Olo nia asesor polítiku) (+670) 723 0048 (Dili)

Jose Manuel Fernandes (Lu Olo nia reprezentante ba eleisaun prezidensial) (+670) 734 2174 (Dili)

http://www.luolobapresidente.blogspot.com, http://luolo.blogspot.com, http://www.timortruth.com