sábado, 5 de maio de 2007

Komunikadu Imprensa: Ramos Horta sósa votus: Evidénsia hosi CD/Video

FRENTE REVOLUCIONÁRIA DO TIMOR-LESTE INDEPENDENTE
FRETILIN


Komunikadu imprensa
4 Maiu 2007

Ramos Horta sósa votus: Evidénsia hosi CD/Video

Aban, FRETILIN sei ható CD/Vídeo ba Komisaun Nasional Eleisoens ne’bé hatudu votantes balu deklara katak ema selu osan ba sira hodi vota ba Ramos Horta iha eleisaun ba dala uluk (primeira volta prezidensial).

CD/vídeo ne’e hatudu momós ema nain lima iha área Venilale nian, distritu Baucau, fó-sásin katak sira simu ósan atu vota ba Ramos Horta no atu mobiliza mós ema-seluk atu vota hotu ba nia, iha primeira volta eleisaun prezidensial nian, iha 9 Abril.

Gravasaun ne’e hatudu momós votantes rua fó-sasin katak Ramos Horta rasik fó ósan ba sira hodi sosa sira-nia votus.

Sekretáriu-Jeral Adjuntu, José Reis, dehan ohin katak partidu FRETILIN simu alegasoens oi’oin katak Ramos Horta sosa-votus , maibé, la foti problema ne’e to agora tamba hein hela evidénsia ne’ebé lo’os no kredível ( bele fiar).

“Agora ami iha ona evidénsia ne’e, ami hakarak husu investigasaun ba ida ne’e”, Reis hatete. “Ami sei haruka CD/vídeo ne’e ba CNE hodi sira haruka halo investigasaun no hola medidas lolós kona ba evidénsia ne’e.

”Ramos Horta halo alegasaun du’un FRETILIN sósa votus , maibé, nia la hatudu prova no la ható keixa ba autoridades sira”.

“Fatin lolós atu ható alegasoens mak instituisaun sira ne’ebé simu mandatu atu halao investigasaun no hola medidas ba ema ne’ebé la tuir leis no regulamentus eleisoens nian”. Tamba ne’e mak ami sei husu ba CNE hodi investiga dokumentasaun kona-ba Ramos Horta sosa votus. Ami husu no hein katak CNE sei aplika prosesu ne’ebé justu no tuir lei”, Reis hatutan.

Foin dadauk ne’e, tamba deit hakarak halo foer kandidatu Franscisco Guterres “Lu Olo” (kandidatu FRETILIN nian) nia naran, Ramos Horta du’un katak FRETILIN halo kampaña foer iha Kulau, suku Becora, iha Dili. Nia ba to ne’ebá hodi rona rasik populasaun Kulau nian , iha 2 de Maiu 2007. Liu tiha enkontru ne’e, nia obrigadu hatete katak nia la hétan prova kona ba alegasoens sira ne’e”.

Jornal “Diário”, sai iha 3 Maiu 2007, tatoli katak:

“ Kandidatu Prezidente, José Ramos Horta la hetan evidénsia kona ba boatus ne’ebé partidu ASDT fó sai katak iha Kulau, ema balun komesa sosa povu nia kartaun eleitoral tamba povu iha direitu atu hetan ajuda mai husi governu”. Jornal ne’e tatoli ta’an :“…(Ramos Horta) haklaken , marka nia prezensa hodi hare povu nia kondisaun relasiona ho boatus nebé mak partidu ASDT hateten, iha área Kulau ema balun sosa povu nia kartaun eleitoral , maibé, bainhira to fatin la hetan evidensia forte …”.

José Reis dehan : Sé Ramos Horta iha evidénsia, ami dezafia nia atu ható ida ne’e ba autoridades sira. Ami hatete bei’beik ona katak sé iha evidénsia karik kona ba kampaña foer ruma tenke ható ida ne’e ba autoridades sira atu investiga. Labele uza ida ne’e ba buka hatún deit kandidatu ninia adversáriu.

Hakarak hatene ta’an informasaun, bele dere arame ba:
José Reis, Sekretáriu Jeral Adjuntu FRETILIN nian, tel. (+670) 7340382 (Dili)
Jose Manuel Fernandes (Lu Olo nia reprezentante ba eleisaun prezidensial) (+670) 734 2174 (Dili)

http://www.luolobapresidente.blogspot.com, http://luolo.blogspot.com, http://www.timortruth.com

0 comments: