Komunidadu Imprensa - Hatán perguntas hirak ne’e, Lu Olo hateten ba Horta

Francisco Guterres “Lu Olo” ba Prezidente “Prezidente husi povu ba povu tomak” Komunikadu imprensa Sexta 4 Maiu 2007

Hatán perguntas hirak ne’e, Lu Olo hateten ba Horta

Kandidatu prezidensial FRETILIN nian, Francisco Guterres “Lu Olo” ezije nia adversáriu atu hatán perguntas sia ne’ebé nia sei dauk hatan to ohinloron.

“José Ramos Horta sei dauk hatán perguntas bárak importantes ne’ebé hau, sosiedade sivil no votantes sira husu ba nia bainhira kampaña lao dadauk”, Lu Olo hateten.

“Nia iha dever atu hatán peguntas tuir mai molok kampaña ramata hodi votantes sira hetan informasaun lolós molok sira vota.”

1. Tamba sa Ramos Horta lakoi halo deklarasaun eskrita kona ba ninia rikun soin tomak?

2. Tamba sa Ramos Horta uza eis- soldadu F-FDTL, ne’ebé halo foer instituisaun ne’e nia naran, Vicente da Conceição (aliás Raiós) hanesan membru importante ekipa kampanha prezidensial ninian? Komisaun Espesial Inkéritu Nasoens Unidas nian fó rekomendasaun katak Railós tenke hatán ba Justisa tamba nia ataka F-FDTL iha Tasitolu, iha 23/5/06, ne’ebé ema nain sia mate. Ami fiar katak iha ona órden ba kaer Railós (mandatu de kaptura).

3. Railós nia kazu dada ba bei’beik no nia sei dauk hatán ba justisa tamba Ramos Horta halo interferénsia iha Prokurador Jeral no sistema judisiariu ninia servisu ?

4. Sá direitu mak Ramos Horta iha hodi tenta manipula Forsas Internasionais Estabilizasaun nian (FSI) kona ba operasaun militar ba kaer Alfredo Reinado tamba deit halo akordu eleitoral ne’ebé nia halo ho partidu polítiku?

5. Tamba sá mak Ramos Horta simu relatóriu Komisaun Notáveis nian iha Fevereiru 2006, maibé, seidauk diskute ba ida ne’e to’o ohinloron ho membrus Governu no Parlamentu nian hodi buka solusaun ba kazu “petisionárius” nian?

6. Tamba sá Ramos Horta hakarak muda lei Fundu Minarai nian , lei ne’ebé liu ho aprovasaun husi partidu hotu hotu iha Parlamentu Nasional no harii sistema kontrole osan minarai diak tebe-tebes no peritos iha nivel internasional temi nudar sistema ida neebe diak liu iha mundu laran?

7. Tamba sá Ramos Horta kontinua lohi ema nafatin iha fatin balu katak nia mós kandidatu ka membru FRETILIN nian, maibé, nia sai tia ona husi Fretilin iha 1984?

8. Tamba sá Ramos Horta hakarak forsas internasionais hela ta’an tinan 5 to tinan 10 iha TL?

9. Ramos Horta promete tinan uluk katak nia sei hapara violensia iha Dili hodi deslokadus sira bele fila ba uma. Tamba sá la kumpre promessa ida ne’e?

“Bainhira hau halo perguntas sira ne’e, Ramos Horta buka halae fali ba asuntu seluk, halo alegasoens oi’oin ba hau ho hai ninia partidu, maibé, la iha prova.”

“Tuir hau nia hare, Ramos Horta sedauk hatene lolos se mak nia hasoru iha eleisaun ida nee.”

“Dalan ida tan hau husu ba Ramos Horta atu lau tuir regras. Husik votantes sira rona saida mak ita hakarak hatete nunee sira bele halo komparasaun ba ita nia liafuan ho hau nian.”

Hakarak hatene ta’an informasaun, bele dere arame ba:

Harold Moucho (Lu Olo nia asesor polítiku) (+670) 723 0048 (Dili)
Jose Manuel Fernandes (Lu Olo nia reprezentante ba eleisaun prezidensial) (+670) 734 2174 (Dili)

http://www.luolobapresidente.blogspot.com, http://luolo.blogspot.com, http://www.timortruth.com