Media Release - LU OLO EZIJE HALO BUAT RUMA BA PETISIONÁRIUS SIRA

Francisco Guterres “Lu Olo” ba Prezidente
“Prezidente husi povu ba povu tomak”

Komunikadu imprensa
28 Abril 2007


LU OLO EZIJE HALO BUAT RUMA BA PETISIONÁRIUS SIRA

“Atu halao Demokrasia no justisa ba hotu-hotu, iha tenke koalia lolós (verdade) no fó tempu ba kura kanik“, kandidatu prezidensial Fretilin nian, Francisco Guterres “Lu oLo“, hatete . Ne’e lisaun uluk liu ita aprende bainhira ita hametin dadaun dame ba tempu naruk iha nasaun ida ké foin sai hosi konflitu hó violénsia oi-oin“

Ohin, loron ne’ebé marka tinan ida ba manifestasaun petisionárius (28Abril 2006), aniversáriu akontesimentu ida ké dudu povu Timor-Leste ba moris iha konflitu ida ho violéncia, hau husu ba hotu-hotu atu labele halimar ho asuntu ne’e ba halo ida-idak ninia polítika. Iha komísiu iha Aileu, nia hatete ba jornalistas atu haré didiak saída mak Primeiru Ministru dehan kona ba asuntu kompensasaun ba petisionárius sira.

Petisionárius maka militares nain 591 ne’ebé hasai ona hosi F-FDTL iha Marsu 2006 tamba abandona sira nia kuartel ho justifikasaun katak sira hetan diskriminasaun.
Lu Olo hatete importante tebe-tebes katak orgaun tolu soberania estadu Timor-Leste nian, hanesan Prezidente Repúblika, Parlamentu Nasional no Governu, atu servisu hamutuk atu hetan solusaun diak ida ba petisionárius sira ninia preokupasoens.

“ Ita tenke haré ba petisionárius sira nia preokupasoens ho responsabilidade no tuir dalan instituisoens nian. Iha ona relatório ida ne’ebé Komisaun Notáveis sira mak halo. Komisaun ható relatóriu neé ba PM Ramos Horta iha primeira semana fulan Fevereiru 2007. Hau simu mós kópia ida, maibé, Parlamentu Nasional tenke hein rekomendasaun mai hosi Primeiru Ministru Ramos Horta. Parlamentu Nasional labele halo buat ida tamba sei dauk simu Primeiru Ministru ninia proposta. Hau hatene katak PM seidauk fahe no seidauk diskute relatóriu ne’e iha Konsellu Ministrus, no sei dauk iha proposta ba hadia problema petisionárius nian. Tamba sá maka atraza hanesan ne’e? Povu iha direitu atu hatene saída maka Komisaun Notáveis ható iha relatóriu ne’e“.

Primeiru Ministru horiuluk, Dr. Mari Alkatiri, mak hili Ministra Ana Pessoa ba Prezidente Komisaun Notáveis nian. Komisaun ne’e halao investigasaun ho kuidadu iha fulan barak nia laran kona ba petisionárius sira nia alegasoens.

“Ita tenke iha kuidadu hodi labele halo fali kanik foun ida bainhira ita taka kanik tuan ida“ , nia dehan. “ Sé ita hakarak fó kompensasaun ba petiosionárius sira, sá impaktu mak sei iha ba soldadus sira seluk“? nia husu.“ Uluk liu, atu hetan solusaun ba problema ida, ita tenke hanoin uluk problema ne’e nia abut mak ida ne’ebé. Alegasoens ne’e iha fundamentu ruma?

Nia hatutan: “Ita tenke rona hosi Komisaun Notáveis hodi ida hatene lia lós. Tenke iha transparénsia no labele uza fali asuntu ne’e ba halo ida-idak ninia jogu polítiku atu manan. Ita nia dever atu evita konflitu seluk hodi nuné ita bele kura kanik ne’ebé haketak ita iha fulan sanulu resin rua nia laran“.

Lu Olo, asu’uain FALINTIL iha tinan 24 nia laran, hatene lolós saída maka petisionárius sira halo hosi Fevereiru 2006. “F-FDTL, instituisaun ida ké importante, harií tuir artigu 146 Konstituisaun RDTL nian. Hau sei servisu nafatin ho sira, sei apoia órgauns hotu-hotu soberania estadu Timor-Leste nian, atu hetan solusaun diak ida hodi garante integridade F-FDTL nian“

Hakarak hatene ta’an informasaun, bele dere arame ba:
Harold Moucho (Lu Olo nia asesor polítiku) (+670) 723 0048 (Dili)
Jose Manuel Fernandes (Lu Olo nia reprezentante ba eleisaun prezidensial) (+670) 734 2174 (Dili)

HYPERLINK "http://www.luolobapresidente.blogspot.com" http://www.luolobapresidente.blogspot.com, HYPERLINK "http://luolo.blogspot.com" http://luolo.blogspot.com, HYPERLINK "http://www.timortruth.com" http://www.timortruth.com