Komunikadu Imprensa - Tenke fó prioridade ba feto sira hatene lé no hakerek, Lu Olo dehan

Francisco Guterres “Lu Olo” ba Prezidente “Prezidente husi povu ba povu tomak” Komunikadu imprensa Sexta 4 Maiu 2007

Tenke fó prioridade ba feto sira hatene lé no hakerek, Lu Olo dehan

Bainhira feto sira hatene lé no hakerek, sira bele tau matan diak liu ba sira nia oan kosok sira hodi se’es sira husi moras oióin ne’ebé halo sira barak mak mate ohinloron iha ita nia rain. Feto sira ho labarik sira nia saúde sei diak liu, kandidatu Prezidensial FRETILIN nian, Francisco Guterres “Lu Olo“ hatete.

Lu Olo hatete katak nia sei harii seksaun feto nian iha ninia Gabinete Prezidénsia atu hametin liu ta’an ajenda dezenvolvimentu nasional kona ba asuntus feto nian, liu liu ba tau matan ba programa alfabetizasaun ba maluk feto sira ne’ebé la hatene lé no hakerek.

“Investimentu ne’ebé halao ba alfabetizasaun feto sira nian sei tulun ba hadia saúde no vida gerasaun ohinloron nian no abanrua nian“, Lu Olo hatete.

“Alfabetizasaun la’os deit ba hanorin feto sira lé no hakerek, maibé, atu aumenta mós sira nia kbiit polítiku no ekonómiku. Ema barak mak hanoin katak feto ne’ebé simu edukasaun bele se’es a’an husi violénsia iha uma laran (violénsia doméstika) tamba iha meius ba tau matan ba nia a’an rasik no lalika sai vítima bei’beik ba ida ne‘e. Problema violénsia doméstika mak problema bo’ot ida iha sosiedades sira ne’ebé foin sai husi konflitu“, Lu Olo dehan.

Lu Olo hatutan: ‘Feto sira iha fatin espesial ida iha ita nia sosiedade. Sira la’os deit importante ba família sira ka ba knaar oi-oin ne’ebé ita halao iha ita nia rain, liu-liu iha to’os fatin, maibé, tamba sira mak sofre liu iha tempu okupasaun Indonesia nian. Feto sira partisipa makás iha Resisténcia liu husi frente armada, frente klandestina no diplomátika“.

Lu Olo hatete nia luta hamutuk ho feto brani barak iha tinan 24 nia laran bainhira sira FALINTIL halao resisténsia armada. “Hau hatene husi hau nia esperiénsia rasik sakrifísius sira ne’ebé maluk feto sira halo ba ita hetan ita ninia independénsia. Ita iha dever atu fó garantia ba feto timor hotu-hotu – ita nia kaben sira, ita nia inan sira, ita nia feton sira no ita nia oan feto sira – atu ema respeita sira no haré sira hanesan ita haré mane sira iha rain ida ne’e“.

Konstituisaun RDTL defende ona igualdade jéneru no direitus feto sira nian, maibé, la’os deit tamba hakerek ona iha lei sira, mak feto sira hetan ona.

“Ita hahú ho kampaña ba aumenta número feto sira nian ne’ebé sei aprende lé no hakerek. Ita tenke tau matan ba halo polítika no estratéjia atu aumenta feto sira nia partisipasaun iha postus servisu oi’oin, hadia sira nia saúde no hametin sira ninia kapasidade atu nuné sira bele mós hola desizaun iha ita nia sosiedade no hetan benefísius independénsia nian.

“Hau sei haré ba buat bar’barak governu FRETILIN nian halo ona no ba atividades ne’ebé organizasoens sosiedade sivil halao ona husi 2001 to ohinloron. Feto klosan no feto ferik sira nia nesesidade ka sira ninia hakarak sei sai fokus ba hau ninia servisu núdar Prezidente RDTL iha tinan lima nia laran bá oin. Seksaun feto sira nian iha hau nia Gabinete Prezidénsia sei sai mekanismu ida ba garante katak feto hotu hotu nia lian sei hatutan ba ajenda nasional“

Hakarak hatene ta’an informasaun, bele dere arame ba:

Harold Moucho (Lu Olo nia asesor polítiku) (+670) 723 0048 (Dili)
Jose Manuel Fernandes (Lu Olo nia reprezentante ba eleisaun prezidensial) (+670) 734 2174 (Dili)

http://www.luolobapresidente.blogspot.com, http://luolo.blogspot.com, http://www.timortruth.com