Komunikadu Imprensa - Lu Olo ezije Ramos Horta deklara kedas nia riku soin hotu hotu

Francisco Guterres “Lu Olo” ba Prezidente “Prezidente husi povu ba povu tomak” Komunikadu imprensa Kuarta feira 3 Maiu 2007

Lu Olo ezije Ramos Horta deklara kedas nia riku soin hotu hotu

Kandidatu prezidensial FRETILIN nian, Sr. Francisco Guterres“Lu Olo“hatete katak ninia adversáriu, Ramos Horta, buka halai husi ninia obrigasaun moral atu hatete sai nia rikun soi hotu-hotu, neébé tenke deklara momós iha surat ida, la‘os deklara deit ho ibun.

Lu Olo, deklara nia rikun soin, liu husi surat ida, iha loron 23 Abril, loron sanulu ona. Ohin Lu Olo ezije katak Ramos Horta mós tenke hakerek momós nia rikun soin, nia simu osan husi ne’ebé, sasán sed-seda mak nia iha (patrimóniu), no sá ligasaun negósiu nian mak nia iha, iha rai Timor-Leste no tasibalu.

Lu Olo dehan: “Ramos Horta iha obrigasaun moral atu halo deklarasaun iha surat hodi povu Timor-Leste bele hatene informasaun kona ba kandidatu ida-idak, no bele fihir didiak sé mak atu sai Prezidente Repúblika“.

“Hau la kompreende tamba sá mak Ramos Horta lakoi hakerek ninia riku soin hanesan hau halo. Saída mak Ramos Horta buka súbar husi Povu Timor-Leste?“

“Nia tauk katak sé nia hakerek nia riku soin, povu Timor- Leste bele haré nia iha kompromisu ruma karik?“

“Nia la halo hanesan hau, nia halo deit deklarasaun hó ibun no deklara deit rikun soin balu“.

“Nia la hatete sai nia rikun soin hotu-hotu no la hatete sai osan hira mak nia simu hosi fonte oi’oin, inkluindu ósan ne’ebé nia hatete nia simu tamba halo seminárius iha

universidades bainhira nia halao hela servisu núdar membru governu“.

“Nia mós tenke hatete lolós sé iha ka la iha amigu ruma halo negósius ho nia - inkluindu negósiu hó ró ne’ebé oras ne’e iha tasi ibunTimor-Leste nian – ho negosiante australianu Sr. Wayne Thomas, husi Territótiu do Norte, ne’ebé iha ligasaun ho Sr. Shane Stone, eis-Prezidente Partidu Liberal Australianu no ema governu Howard nian“.

“Horta la hatete sai ninia konta iha banku“.

“Iha tan buat ruma Ramos Horta lakoi hatete sai?“ Lu Olo husu.

Lu Olo dehan Ramos Horta halo deklarasaun ridíkula ba media Timor Leste nian tamba nia dehan katak, depois de nia eleitu Prezidente Repúblika, mak sei deklara sai ninia rikun soin.

“Ne’e tarde liu ona. Nia devia halo tiha ona deklarasaun ne‘e bainhira kampaña hahú hodi fó tempu ba povu bele húsu kona ba deklarasaun ne’e“, Lu Olo dehan.

“Assina deklarasaun ba hatete lolós rikun soin hatudu integridade no transparénsia. Ramos Horta labele hatete deit katak tamba lei la iha kona ba ida ne’e, nia lalika hatete sai ninia rikun soi. Hau apoia NGO’s sira ne’ebé husu ba Ramos Horta atu hatete momós nia riku soin hotu-hotu““

“Ramos Horta evita assina deklarasaun kona ba ninia riku soin, maibé, buka dadaun mós foti lia falsu kona ba hau nia riku soin“, Lu Olo hatutan.

“Hau hatete sai ona hau nia riku soin hotu-hotu iha deklarasaun ne’ebé hau halo iha 23 Abril 2007. Hau la iha tan riku soin seluk. Hau hatudu ona transparénsia (hatete lolós). Hau bele hatán sé karik ema husu hau kona ba ida ne‘e“.

“Ramos Horta soe lia falsu kona ba hau, hau la simu pensaun Portugal nian no hau la iha mansaun (uma bo’ot) hanesan sira dehan. Hau nia família nia uma, iha Ossú, halo hó hau nia familia tomak nia kósar bén, uma ne’e simples ida, la’os uma bo’ot ho valor hanesan sira fó“. Ramos Horta moris iha mansaun ida no iha, pelumenus, uma ida iha tasibalu, iha Australia.

“Hau hatete sai hau nia riku soin bainhira kampaña hahú hanesan atu voluntáriu (hau mak hakarak halo) hodi hatudu hau hakarak iha transparénsia. Hau haksolok katak ema iha interese ba asuntu ne’e. Hau hanoin katak hau hetan duni hau nia objetivu, ne’e duni, aban bairua, ita tenke halo leis kona ba ida ne’e hodi ita moris hó transparénsia“.

“Bainhira ita halao leis hanesan lei kona ba minarai no fundu minarai , governu FRETILIN nian hatudu ona katak ita hakarak deklara momós ita nia riukun soi ba ema hotu-hotu“.

Hakarak hatene ta’an informasaun, bele dere arame ba:

Harold Moucho (Lu Olo nia asesor polítiku) (+670) 723 0048 (Dili)
Jose Manuel Fernandes (Lu Olo nia reprezentante ba eleisaun prezidensial) (+670) 734 2174 (Dili)
http://www.luolobapresidente.blogspot.com, http://luolo.blogspot.com, http://www.timortruth.com