Komunikadu Imprensa - Fretilin kritika uza bandeira nasional iha boletin votu

FRENTE REVOLUCIONÁRIA DO TIMOR-LESTE INDEPENDENTE
FRETILIN

Komunikadu inprensa
30 Marsu 2007

Fretilin kritika uza bandeira nasional iha boletin votu

Partidu maioritáriu Timor-Leste nian, Fretilin, horseik kritika desizaun kandidatu hat, husi kandidatu nain ualu ne’ebé kandidata ba eleisaun prezidensial iha loron 9 Abril tamba sira uza bandeira nasional nudar sira nia simbolu iha boletin votu .

Sira nain hat nee mak Jose Ramos Horta (independente), Avelino Coelho (PST), Lucia Lobato (PSD) no Xavier do Amaral (ASDT)). Fretilin nia kandidatu, Sr. Francisco Guterres “Lu Olo” sei uza bandeira FRETILIN nian nudar símbolu ba ninia kandidadtura iha boletin votu.

Dirijente senior Fretilin nian, Filomeno Aleixo dehan katak desizaun ba uza bandeira nasional halo prosesu ne’e la mo’os no sai perigozu, tanba kandidatu hat ne’e ba eleisoens prezidensiais nudar independente ka selae nudar kandidatu husi partidu politiku.

Filomeno moos hatete: “Uza bandeira nasional iha boletin votu nee tentativa ba lohin no habosok votantes tamba populasaun barak liu 50 persentu, maka la hatene hakerek no lé surat.

“ Tamba kandidatu hat ne’e uza símbolu hanesan deit, ami la hare’e oinsa kandidatu ida idak bele diferencia a’an husi sira seluk ,” hatete Aleixo, membru Komisaun Politika Nasional.

Nia dehan katak desizaun husi Comissaun Nasional Eleisaun nian atu husik uza bandeira nasional nudar simbolu iha boletin votu nee sai asuntu sériu ké estraga prosesu justu no transparente ba eleisaun ida nee.

Fretilin husu Tribunal Rekursu atu deklara inválida desizaun Commissaun Nasional nian maibé, horseik Tribunal deklara katak bele uza bandeira nasional iha boletin votu tamba la’os illegal.

Kandidatu Prezidensial Fretilin nian, Francisco Guterres “Lu Olo” halao dadaun ninia kampaña. Horseik nia sorumutu ho populasaun Bobonaro nian, iha Maliana. Sorumotu nee hetan susessu boot ho populasaun besik 8,000.

Lu Olo dehan katak tamba populasaun barak maka ba sorumotu, ida ne’e hatudu katak nia iha apoio makas husi distritus Loromonu nian, maske ema balun buka halo populasaun kontra Fretilin.

Se precisa informasaun barak liu tan favor kontakta:
Mari Alkatiri (+670) 733 2360 (Dili) Filomeno Aleixo: (+670) 723 3460 (Dili) Arsenio Bano: (+670) 723 0023 (Dili) Jose Manuel Fernandes: (+670) 734 2174 (Dili)