Komunikadu Imprensa -Lu Olo dehan ba Horta: Kandidatu FRETILIN mesak ida deit

Francisco Guterres “Lu Olo” ba Prezidente “Prezidente husi povu ba povu tomak” Komunikadu imprensa Kuarta-feira, 2 Maiu 2007

Lu Olo dehan ba Horta: Kandidatu FRETILIN mesak ida deit

Kandidatu prezidensial FRETILIN nian, Francisco Guterres “Lu Olo”ezije nia adversáriu atu labele uza ta’an
FRETILIN nia naran arbiru deit iha ninia kampaña.

Tamba sá Sr. Ramos Horta uza bei’beik FRETILIN nia naran? Nia hatene a’an katak nia husik FRETILIN iha 1984, iha tempu súsar nia laran. Sr. Horta la’os ona membru FRETILIN nian, no nia la’os kandidadtu FRETILIN nian. Nia tenke hatudu nia a’an iha kampaña ne’e, lalika finje koalia oin seluk ”.

"FRETILIN ható tia ona protestu iha primeira ronda tamba Sr. Horta uza FRETILIN nia naran. Sr Horta halo fali ona, hatete ba ema katak nia maka harii no tau bandeira FRETILIN nian iha Timor-Leste.Nia hatene katak povu, liuliu sira nebé moris iha foho, iha respeitu bo’ot ba FRETILIN. Hau,fo’foun kedas tama ba FRETILIN no tuba rai metin ho FRETILIN to ohin loron”.

"Sr. Horta dehan katak nia sei salva FRETILIN, maibé, FRETILIN salva a’an tiha ona iha 2001, bainhira dada a’an husi CNRT, no hari’i a’an mesak hanesan partidu polítiku hodi kompete iha eleisoens Asembleia Konstituinte/Parlamentu
Nasional”.

“Hau haksolok tebe-tebes tamba haré juventude barak iha hau ninia komísius. Maioria povu ita nian hakarak hametin nafatin FRETILIN ninia tradisaun, defende nafatin ita nia independénsia. Liu tiha debate iha televizaun ho Sr. Ramos Horta, ne’ebé halao iha 4 Abril 2007, hau simu mensájen bar’barak hosi Timor-Leste tomak.

Hau fó hau nia agradesimentu ba sira no hau ható ba sira katak hau iha orgulhu tamba hetan apoiu ida ne’e. Apoiu ne’e hatudu mai hau katak povu haksolok hau nia mensajen ne’ebé fó sai momós, la beduk tun sai. Hau la finje hatudu buat ne’ebé hau la’os.”

Hau hakarak agradese Sr. Jacob Xavier husi PPT no Sr. Manuel Tilman husi KOTA, ne’ebé halo apelu ba sira ninia militantes ba vota mai hau. Sira nia apoiu hatudu katak ema la konsegue fahe ita ba Loro Sae no Loro Monu. Ita povu ida deit, Povo Maubere, no hau sei sai Prezidente ba ema hotu.”

“Hau husu ba sidadaun ida-idak atu vota fila fali ba independénsia no Unidade Nasional. Timor-Leste ida deit, no kandidatu FRETILIN ida deit. Husi Nicolau Lobato to Lu’Olo hanoin ida deit, hakarak ida deit: Libertasaun Povu Maubere nian.”

Hakarak hatene ta’an informasaun, bele dere arame ba:

Harold Moucho (Lu Olo nia asesor polítiku) (+670) 723 0048 (Dili)

Jose Manuel Fernandes (Lu Olo nia reprezentante ba eleisaun prezidensial) (+670) 734 2174 (Dili)

http://www.luolobapresidente.blogspot.com,
http://luolo.blogspot.com,
http://www.timortruth.com