Komunikadu Imprensa - TENKE INVESTIGA EMA NE’EBÉ SUSPEITA OHO EMA MAK HALAO HELA KAMPAÑA ELEITORAL

Francisco Guterres “Lu Olo” ba Prezidente “Prezidente husi povu ba povu tomak” Komunikadu imprensa Segunda-feira 30 Abril 2007

TENKE INVESTIGA EMA NE’EBÉ SUSPEITA OHO EMA MAK HALAO HELA KAMPAÑA ELEITORAL

Eis sarjentu mak hasai hosi F- FDTL ne’ebé ikus mai sei ba hatán iha Prokuradoria Jeral kona ba tiru malu ne’ebé halo ema balu mate, halo parte moos ekipa ne’ebé halao kampaña José Ramos Horta nian.

Vicente da Conceição (alias Railós) ema ne’ebé Ramos Horta hili ba halo ninia kampaña iha Liquiçá. Atividade kampana hirak ne’ebé nia halo hanesan iha fatin hirak ne’ebé militante FRETILIN nian iha suku hetan ho matan iha sorumotu ida halao iha Vatuboro, hamutuk ho votantes sira hodi halo promosaun ba José Ramos Horta. Iha distritu Liquiçá, nia tulun moos halao mobilizasaun ba sira ne’ebé hela iha vila, iha Liquiçá ne’ebé halao kampaña iha loron 24 fulan Marsu 2007 no mós organiza no suporta komísio ba kandidadtura José Ramos Horta nian iha Fatukesi, loron sexta feira santa, ne’ebé militantes FRETILIN nian rasik mak sai sásin.

Hahú kedas husi ba kampaña ba dala uluk, Railós lao ba mai iha Dili, Ermera no Liquiçá ho Pajero mutin ida 4WD (xapa matríkula 15-013) no hetan eskolta makás husi ofisial polísia nasional Timor-Leste nian.

Kandidatu FRETILIN ninian, Francisco Guterres “Lu Olo” husu Ramos Horta atu hatete lolós kona ba ligasaun ne’ebé nia halao hó Railós no dehan katak nia sei husu atu halo investigasaun karik Ramos Hora interfere iha Railós ninia prosesu iha Prokuradoria Jeral.

Railós ne’ebé F-FDTL duni sai iha 2004 tamba assuntu kona ba ósan ne’ebé nia halo iha nebá, tuir rekomendasaun Komisaun Inkeritu Nasoens Unidas nian ható iha fulan Outubru tinan kotuk, tenke ba hatan iha Prokuradoria Jeral.

Komisaun Nasoens Unidas nian rekomenda katak Railós tenke hatán iha Prokuradoria - Jeral tamba nia maka dada dalan ba ninia grupu hodi ba ataka F-FDTL iha Tacitolu no Tibar iha 24 Maiu 2006, rezulta ema nain sia mate ho kilat musan e no mós “tamba nia lao ba mai ho kilat ilegal”.

Ema hatene katak Railós ba to PM ninia servisu fatin, segunda feira kotuk, loron 23 Abril, wainhira Sr. Ramos Horta la iha fatin. Jornalista Timorense tatoli katak Railós hetan malu ho PM ninia konseleiru ba investimentus, australianu Chris Santos, ema ne’ebe Nasoens Unidas maka selu ba servisu ba PM Ramos Horta. Santos lakoi hateten sai tamba sá mak nia hetan malu ho Railós no saída maka sira nain rua koalia.

Ema fiar katak iha ona órden ida ba kaer Railós, maibé, la hatene tamba sá mak sei dauk halao órden ida ne’e.

Lu Olo dehan katak, karik nia mak eleitu Prezidente, nia sei husu ba Parlamentu Nasional atu harii Komisaun ida hodi investiga interferénsia polítika iha gabinete Procurador Jeral nian kona ba krimes ne’ebé ema ható katak mosu durante krize 2006.

“Hau preokupa ho deklarasaun ne’ebé Prokurador Jeral halo ba imprensa kona ba prosesu investigasaun ba Railós”, Lu Olo hatete.

Lu Olo koalia kona ba notísia ne’ebé sai iha jornal Diário kuarta-feira kotuk, 25 Abril, ne’ebé fó sai katak Prokurador Jeral hatete nia sei bolu Railós ba hatán kona ba alegasoens hirak ne’ebé hasoru nia, maibé, buat hirak ne’e sei bela halao hafoin eleisaun Prezidensial.

Komentáriu José Ramo Horta nian , ne’ebé sai iha Jornal Diário, loron 16 Abril 2007, bele interpreta hanesa nia dehan katak Railós sei dauk bele mai hatán bá autoridade Prokuradoria ninian tamba nia halao mediasaun ba petisionárius sira.

Jornal Diário loron 16 Abril 2007 fó sai mós Ramos Horta nia liafuan kona ba Railós nebé hateten: “ Kazu ida nee Procurador Jeral Repúblika mak hatene tamba ne’e Rai Los agora apoia makas buka halo diálogo ho peticionáriu sira. Hau kontakta Railós no sira hotu hotu hatene para buat ida deit koalia ho peticionariu sira ne’e no ajuda halo diálogo ho F-FDTL.”

Iha 24 Abril, Ramos Horta anunsia katak, karik nia eleitu Prezidente, nia sei fó orden ba Prokurador - Jeral atu loke fila fali ninia investigasaun kona ba akontesimentus iha Maiu- Juñu tinan uluk.

Ohin, Lu Olo hatete ta’an: “ Tamba Ramos Horta deklara a’an katak nia iha intensaun atu intervén iha investigastigasaun Prokurador Jeral nian kona ba kazu kriminal ida, ne’ebé Railós mosu hanesan testemuña prinsipal, hau husu: Tamba sá Prokurador Jeral só bolu deit Railós bainhira eleisaun halao tiha ona? Keta hau nia adversáriu, núdar Primeiru Ministro, halo karik presaun ruma ba Prokurador Jeral ? Ka ema seluk ruma halo presaun ba nia hodi dada naruk ba bei’beik loron ne’ebé Railós tenke hatán investigasaun ?

Lu Olo hatete: Nia la dehan katak Prokurador Jeral halo sala ruma. “Prokurador Jeral foin lalais ne’e hatudu ona ba ema hotu katak nia halao ninia knaar ho independénsia, la hakru’uk ba ema ida. Maibé, ita hotu hatene keta ema balu halo karik presaun oi’oin ba Prokurador Jeral, por ezemplu, deklarasaun ne’ebe hatudu katak hau nia adversáriu iha ligasaun no fiar ba Railós.

“Ami mós iha direitu húsu sé deklarasaun ne’e iha ligasaun ruma tamba Railós mak halao kampaña hau nia adversáriu nian iha Liquiçá no Ermera “

“Hau fiar katak ita sei do’ok husi asuntu ne nia abut. Atu fó garantia ba ita nia sistema justisa ninia lalaok iha loron oin mai, ita tenke hetan resposta lalais ba asuntu ne’ebé, tuir ema balu nia haré, la iha folin. Hatudu katak ema ida deit hakarak fali tau a’an ás liu husi prosesu legal no lei nia leten.

“ Hatudu momós mai ita sá sistema justisa maka ita sei iha, karik Ramos Horta eleitu hanesan Prezidente. Sistema ida ne’e seletivu tebe-tebes ( katak hili malu deit) , hanesan iha tempu Suharto nian, Prezidente mak hatudu sé mak tuir investigasaun , sé mak la tuir.

“ Hau sei luta ba evita buat sira ne’e atu akontese fila fali iha ita nia rain, iha ita nia istória”, Lu Olo dehan.

Lu Olo husu ona ninia adversáriu atu “respeita Konstituisan no leis Timor-Leste nian, respeita independénsia instituisoens nian, liu-liu Tribunais no Prokurador-Jeral”.

“ Prokurador –Jeral, Prokurador-Jeral adjuntu no ema seluk ta’an hosi ita nia sistema justisa hatudu maturidade bo’ot tebe-tebes no korajen ba defende independénsia institusional hasoru atakes ne’ebé hau nia adversáriu halo”, Lu Olo dehan. Sira hatudu katak sira kompreende liu no iha kometimentu liu hau nia adversáriu, kona ba ita nia Konstituisaun no leis “Lu Olo hatutan ta’an”.

“Hau hakarak sira atu hatene katak, hanesan Prezidente, hau sei halao lalais hau nia kna’ar ho Parlamentu, governu, no parseirus dezenvolvimentu, hodi haré ósan hira maka sira presiza ba halao sira nia knaar no reforsa Tribunais sira no Gabinete Prokurador-Jeral nian.

“ Bainhira ita iha solidariedade ida ne’e maka ita bele hametin instituisoens sira nia independénsia no transparénsia, ne’ebé importante tebe-tebes ba ita nia nasaun ninia futuru. Tamba hau nia adversáriu halo komentárius sabraut deit, ema hotu ne’ebé preokupa ba ida ne’e, bele haré momós katak ami nain rua la hanesan”.

Lu Olo hatete katak nia haksolok tebe-tebes tamba nia haré katak membrus Parlamentu balu fó apoiu ba ninia deklarasaun hanesan Vicente Guterres

( Partidu kristaun demokrátiku/ Uniaun Demokrátika Kristã) no Silvério Pinto, Provedor-Adjuntu ba Direitus Umanus no Justisa.

“Hau hanoin ema hotu-hotu kompreende katak importante tebe-tebes Prokurador-Jeral no ninia Gabinete iha independénsia núdar riín bo’ot liu ba ita nia sistema justisa”, Lu Olo dehan.

Hakarak hatene ta’an informasaun, bele dere arame ba:

Harold Moucho (Lu Olo nia asesor polítiku) (+670) 723 0048 (Dili)
Jose Manuel Fernandes (Lu Olo nia reprezentante ba eleisaun prezidensial) (+670) 734 2174 (Dili)
http://www.luolobapresidente.blogspot.com, http://luolo.blogspot.com, http://www.timortruth.com

1