segunda-feira, 30 de abril de 2007

Komunikadu Imprensa - Lu’Olo hato’o ba Horta: Para manipula Forsa Militar Australia nian


Francisco Guterres “Lu Olo” ba Prezidente

Prezidente husi povu ba povu tomak”

Komunikadu imprensa

29 Abril 2007



Lu’Olo hato’o ba Horta:

Para manipula Forsa Militar Australia nian


Kandidatu presidensial Francisco Gutteres Lu’Olo husu nia adversáriu José Ramos Horta atu para manipula Forsas Militares Australia nian atu nia bele manan eleisaun.


Horta fo sai ba publiku katak nia hakarak ISF (Forsas Internasionais de Estabilização) hapara operasaun ne’ebé halao hela atu kaer Reinado hodi nia bele manan votus hosi apoiantes Reinado nian iha Partido Demokratika (PD)”, dehan Lu’Olo. “Nee hatudu katak nia hakarak kontrola ISF hodi nia bele manna votus.”


Lu’Olo haktuir: “Timor oan lima (5) mate iha operasaun ne’ebé iha objetivu kaer Reinado atu lori nia ba justisa. Soldadus Australiano sira mos arriska a’an iha operasaun ne’e, no Timor-oan sira nebe hela iha knua nebe Alfredo subar ne’e, moris iha susar laran.


Agora Horta hakarak hapara operasaun ne’e tamba, sé ISF sira kaer duni Alfredo, hahalok ida ne’e bele hamenus ninia oportunidade atu manan eleisaun ba Prezidente Repúblika . Ita labele simu buat ne’e. Hanesan soldadu horiuluk, hau bele dehan katak militares sira labele halao sira nia knaar tuir lideransa polítika ninia hakarak. Militar sira tenke se’es a’an hosi politika, tuir Konsititusaun RDTL nian.”


Iha primeira ronda eleisaun presidensial Lu’Olo manan votus barak liu ho total hamutuk 28%. Horta hetan votus hamutuk 22%. Tamba Kandidatu nein ida manan maioria absoluta (50% +1), sei iha eleisaun presidensial segunda ronda iha loron 9 fulan Maiu. Votus hosi kandidatu Fernando Araújo “Lasama”, nebe hetan terseiru lugar ho votus hamutuk 19%, mak sei sai determinante liu ba rezultadu final eleisaun prezidensial.


Lasama manan votus barak hosi distritu parte Oeste nian tamba Reinado mós husu votantes sira fó apoiu ba kandidatu ida ne’e. Lasama tau kondisaun katak operasaun kaptura ba Reinadu tenke para molok halo akordu ho Ramos Horta atu apoia ninia kandidatura. Ramos Horta fo ordem ba hapara operasaun militar ba Reinado iha loron 23 Abril, loron hat antes de assina akordu ho Lasama.


Iha konfirmasaun indireta hosi Brigadeiru australianu Mal Rerden, komandante ISF, katak Horta hakarak uza forsas militares australiana atu halo ninia polítika tuir ninia interesse rasik. Iha semana liu ba, Rerden konfirma katak Primeiru Ministru Horta hatete sai ba publiku katak nia hakarak ISF hapara sira nia operasaun kontra Reinado. Maibe Rerden hatete mos katak nia seidauk simu orden ofisial foun. Iha entrevista nebe nia fo ba jornal Diario iha loron 25 fulan Abril, Rerden dehan “Ami seidauk simu surat formal ida hosi Governu. Se Governu foti desisaun katak nee mak solusaun diak liu, entaun Governu no ISF tenke tur hamutuk ba diskute assuntu nee.”


Primeiru Vise Ministru, Estanislau Da Silva, nebé iha responsibilidade ba kordena Governu bainhira Horta halao ninia kampanha, konfirma komentariu ne’ebé Brigadeiru Rerden halo: “Seidauk iha mudansa ofisial kona ba posisaun estadu Timor-Leste nian no la iha rekomendasaun hosi reuniaun Komisaun Kordenasaun Alto Nivel nian, halao foin lalais ne’e ” dehan Da Silva. “Hau hetan malu ho Presidente Xanana Gusmão iha Kinta-feira loron 26 fulan Abril no la ika rekomendasaun sau hosi reuniaun ida ne’e” haktuir da Silva.


Komisaun Koordenasaun Altu Nível inklui membrus instituisoens tolu ne’ebé tau matan ba seguransa, hanesan Presidente Repúblika, Prezidente Parlamentu, Primeiru-Ministru, no mós Primeiru Vice-Primeiru Ministru, no Reprezentante Espesial Nasoens Unidas nian. Komandantes F-FDTL no ISF nian mos partisipa iha Komisaun ne’e hanesan konvidadus.


Tuir Konstituisaun RDTL nian, Horta la iha kbiit atu hola desisaun mesak, nudar Primeiru Ministru ka nudar Presidente” hatete Lu’Olo. “Timor-Leste la presiza Prezidente ida nebe la hakru’uk ba Konstituisaun RDTL nian. Órgauns soberania tolu Estadu Timor-Leste nian (Presidente, Parlamentu Nasional no Governu) maka tau matan lesuk ba seguransa Timor-Leste nian. Horta tenke aprende hatudu respeitu ba mekanismu institusional nebé ita iha ona molok fo sai komentariu ka komitmentu ruma ba publiku sira.”


Media Australia nian, ABC, ható katak deputadu Leandro Isaac, nebe kaer kilat no mos involve iha krise nia laran, hasoru tiha ona hó Horta no husu ba nia atu fo ordem hodi hapara operasaun.


Kontaktu:

Harold Moucho (Lu Olo nia assessor polítiku) (+670) 723 0048

José Manuel Fernandes ( Lu Olo ninia reprezentante ofisial) (+670) 734 2174


http://www.luolobapresidente.blogspot.com, http://luolo.blogspot.com, http:/www.timortruth.com



0 comments: