Komunikadu Imprensa - Tamba nia iha uma kain rasik, nia hatene promove valores família nian

Francisco Guterres "Lu Olo" ba Prezidente
"Prezidente husi povu ba povu tomak"



Komunikadu imprensa

Kuarta-feira 18 Abril 2007


Tamba nia iha uma kain rasik, nia hatene promove valores família nian

Kandidatu prezidensial Fretilin nian Francisco Guterres "Lu Olo" dehan ohin katak, sé povu hili nia ba Prezidente da Repúblika, nia sei servisu hamutuk ho governu ba halao politika ida ké reforsa papel família nian no haburas estatutu fetu sira nian.

Lu Olo hatete, "Família mak sosiedade nia fukun ki'ik liu. Se la iha domin, dame no armonia iha família nia laran, sosiedade mo'os sei la iha dame rohan laik. Labarik sira hahú relasiona ho ema seluk iha nia uma laran rasik. Sé família iha relasaun diak ba malu, labarik sira aprende lalais oinsá atu hadomin no respeita ema seluk.

"Hau hadomi, respeita no fó onra ba hau nia kaben, Cidália Lopes Nobre Mouzinho Guterres. Hau rona nia no hatán ninia kuran (nesesidade). Liu hosi hau nia relasaun ho Cidalia mak hau kompreende diak liu ta'an feto sira nia kuran rasik iha ita nia sosiedade ; hau fó apoio tomak katak feto no mane iha direitu hanesan".

Lu lo Olo hateten katak Cidália sei sai primeira dama ida ké diak tebe-tebes.

"Cidália, buibere ida, feto Timor-Leste nian, sei sai primeira dama ne'ebé moris no hametin a'an ho ita nia istória rasik, ita nia valores no ita nia kultura rasik no ita nia tradisoens rasik. Cidália ema ida ké laran luak, hadomin, ema matenek ida ho néon nakloke ba buat hotu-hotu. Hau seiuza ninia vizaun no orientasaun ba hadia no hametin liu ta'an hau nia knaar núdar Prezidente Repúblika.

"Ami nain rua iha oan rua, Francisco Cidalino Guterres (Olokai), tinan tolu, no Eldino Nobre Guterres, tinan ida. Núdar sira nia aman, hau hakarak hau nia oan sira atu iha buat ne'ebé aman ho inan hotu-hotu hakarak: edukasaun diak, asesu ba servisus saúde gratuitus (la selu), asesu ba bé mo'os no hela iha uma kain rasik.

"Hau sei servisu hamutuk ho governu para labarik sira hetan duni buat sira ne'e hotu"



Hakarak hatene ta'an informasaun, bele dere arame ba:

Harold Moucho (Lu Olo nia asesor polítiku) (+670) 723 0048 (Dili)

Jose Manuel Fernandes (Lu Olo nia reprezentante ba eleisaun prezidensial) (+670) 734 2174 (Dili)



http://www.luolobapresidente.blogspot.com, http://luolo.blogspot.com, http://www.timortruth.com