Komunikadu Imprensa - Lu Olo sei serve povu tomak no defende makás ita nia nasaun

FRENTE REVOLUCIONARIA DO TIMOR-LESTE INDEPENDENTE
FRETILIN

Francisco Guterres Lu Olo ba Prezidente
"Prezidente Husi Povu ba Povu Tomak"



Komunikadu ba imprensa
17 Abril 2007

Lu Olo sei serve povu tomak no defende makás ita nia nasaun

Kandidatu Prezidensial Francisco Guterres "Lu Olo" promete ohin katak nia sei tau Timor-Leste nia intereses iha leten liu, maibé, nia sei halao relasaun diak ho rai sira seluk.

Nia dehan ida nee bainhira nia hatan deklarasaun husi José Ramos-Horta katak relasaun entre Timor-Leste no rai vizinhos sei susar sé Lu Olo sai Prezidente Repúblika.

"Núdar funu nain tinan 24 nia laran iha foho, iha tempu Rezisténsia nian, hau prova ona hau nia kompromisu ba defende povu Timor-Leste no ita nia nasaun ninia intereses" dehan Lu Olo.

"Relasaun internasional laos deit ita iha ka la iha amigus pesoais. Importante mak relasaun entre estadu ida ho estadu seluk no sira nia instituisoens. Hau sei respeita ba beibeik no sei buka promove amizade entre Timor-Leste no estadu selu seluk, maibé, hau sei defende makás liu Timor-Leste no tau ita ninia intereses uluk liu."

"Hau sei la husik Timor-Leste atu ba hela ka servisu iha Nova Iorque ka rai seluk. Timor-Leste mak hau nia rain, hau nia pátria; hau halo funu ba rai ida ne'e no hau haré rasik hau nia kamaradas sira luta no mate ba rai ida ne'e. Hau hakarak moris iha ne'e no sei la husik ita nia rai furak no domin ida ne'e."

"Núdar Prezidente Parlamentu hau halo visita ofisial ba rai barak no simu reprezentantes Parlamentu barak mai hosi Australia, Indonesia no hosi rai sira ne'ebé koalia lian Portugés. Hau hari''i relasoens diak tebe tebes ne'ebé sei hametin ba tempu naruk no sei tulun hau atu halao hau nia knaar núdar Prezidente Repúblika hodi haburas diak liu taan relasoens internasionais ho ita nia rain."

Lu Olo mos kestiona sé Ramos Horta bele reprezenta Timor oan hotu - hotu husi Timor-Leste tomak.

Nia rejeita akusasaun husi Ramos Horta – ne'ebé sai horseik iha imprensa lokal – katak núdar Prezidente, Lu Olo sei hetan susar atu hakuak nasaun tomak. Kona ba akuzasaun ida ne'e, Lu Olo dehan: "Núdar Prezidente Parlamentu Nasional nian, hau hatene oinsá halao jestaun diferensas no oinsá promove dialogu ho susesu entre partidus politkus oi 'oin iha ita nia Parlamentu. Hau halo buat sira ne'e hotu bainhira hau mo'os membru FRETILIN nian.

"Hau manan primeira ronda eleisaun presidensial tamba hau hetan votus hosi Timor-Leste tomak, laos iha Dili deit. Senhor Ramos Horta la hetan votos barak ih distritu barak. Hau preokupa ba ida ne'e tamba hau haré katak nia labele representa povu hosi rai Timor-Leste tomak."

Sé presiza imformasaun liu tan, kontakta ho:
Harold Moucho (Lu Olo nia asesor polítiku) (+670) 723 0048 (Dili)Jose Manuel Fernandes (Lu Olo nia reprezentante ofisial ba eleisaun prezidensial) (+670) 734 2174 (Dili)

http://www.luolobapresidente.blogspot.com/, http://luolo.blogspot.com/, http://www.timortruth.com/