Komunikadu Imprensa - Lu Olo manan iha primeira rona eleisaun prezidensial contra manobras hotu-hotu

FRENTE REVOLUCIONÁRIA DO TIMOR-LESTE INDEPENDENTE
FRETILIN

Komunikadu imprensa
12 Abril 2007


Lu Olo manán iha primeira ronda eleisaun prezidensial contra manobras hotu-hotu

Francisco Guterres, kandidatu Fretilin nian manan iha primeira ronda eleisaun prezidensial nian – rezultadu ida ne’bé Fretilin haksolok ohin, quinta feira, hanesan “vitória ida kontra manobras hotu-hotu”.

Lu Olo ninia reprezentante ofisial , José Manuel Fernandes hatete: “Fretilin fiar katak biar Lu Olo la manán ho maioria absoluta, ne’e vitória ida contra manobras hotu-hotu tamba primeira ronda iha taan kandidatu hitu seluk mak tuir eleisoens prezidensiais no kandidatu balu simu tulun momo’os hela husi Prezidente Xanana Gusmão no husi membrus balu husi hierarkia Igreja Katólika nian”.

Ho kontajen ne’ebé ramata ona, bele haré ona katak la iha kandidatu ida ké manán liu 50% atu manán kedas iha primeira volta. Lu Olo mak manán barak liu, ho 28,79 %, tuir fali, José Ramos Horta ho 22.6% no Fernando Lasama ho 18.52%.

Sekretáriu Jeral Adjuntu, Fernandes hatete :“Hamutuk hotu Lu Olo manán votus liu 103,000, konta ho Dili mo’os. Husi Dili deit, Lu Olo manan votus bárak liu 10,000. Ida ne’e hatudu katak nia iha segundu lugar iha Dili, la’os fali hanesan media balu tatoli”,.

Segunda ronda votasaun ba Prezidente Repúblika sei halao iha Maiu 2007. Lu Olo sei tuir eleisan ne’e hó Ramos Horta.

Fernandes hatete: “Ami hatán rezultadu ne’e no respeita povu ninia desizaun. Povu sei iha oportunidade dal ida ta’an atu vota fila fali. Iha segunda volta, mak ita sei haré momos kandidatu ida ne’ebé mak povu hili duni”.

Fernandes hatete katak Fretilin sei fó hanoin nafatin CNE (Comissão Nacional de Eleições) kona ba irregularidades ( buat ne’ebé la halao tuir dálan lo’os). Nia mo’os hatutan katak partidu Fretilin respeita direitu kandidatu ida-dak nian atu ható késar ba CNE.

“Maibé, ami la hatene tamba sá mak kandidatu sira seluk foin aprezenta sira nia késar kona ba eleisaun ida ne’e. Bainhira sira sei dauk hatene katak Lu Olo ho kandidatu ida ta’an mo’os manán primeira volta, ema ida la foti problema. Agora ké hatene ona katak Lu Olo mo’os manán, kandidatus sira seluk halo késar hamutuk”, Fernandes hatete.

“Fretilin afirma katak késar sira ne’e tenke aprezenta tuir prosedimentu legal. Buat ne’ebé ké sala tenke trata tuir lei no prosesu ne’ebé iha ona ba asuntu ida-idak. Ida ne’e parte importante tebe-tebes atu haburas demokrasia no oportunidade ida ba eduka ita nia votantes sira”.

Fernandes fo hanoin fila fali kona ba késar ne’ebé Fretilin ható iha 5 de Abril atu hasai Martinho Gusmão hanesan porta-voz CNE nian depoisde nia hatete ba ema hotu-hotu sá kandidatu maka nia apoia atu sai Prezidente Repúblika.

“CNE la hasai Sr. Martinho no husik nia halo nafatin deklarasaun ne’ebé halo foer Fretilin nia naran no CNE mo’os nudar órgaun ida ké tenke iha independénsia no neutralidade, Fernandes hatete.

“Tamba asuntu ne’e interesa ba haburas demokrasia no justisa iha rai ida ne’e, ami husu dala ida ta’an ba CNE atu hasai Sr. Martinho Gusmão hanesan porta-voz CNE nian. Ami husu mo’os Igreja katólika atu hili fali ema seluk ba Igreja ninia reprezentante iha CNE. Sr. Martinho sai fali elementu ida ké hamoe Timor oan hotu-hotu”.

Fernandes hatete fila fali katak Fretilin kritika Prezidente Xanana Gusmão no Primeiru Ministru Ramos Horta tamba sira nain rua abuza sira nia posizaun iha estadu Timor-Leste nian molok eleisaun halao ba oin. Ho ida ne’e sira nain rua hatudu sira nia tentativa ba promove Ramos Horta ninia kandidatura ba Prezidente Repúblika.
“Gusmão, Ramos Horta no Bispo D. Alberto Ricardo da Silva mosu hamutuk iha televizaun hodi ható mensájen Páskoa nian iha sexta feira santa”.

“Hanesan kandidatu prezidensial, Ramos Horta la devia ható mensájen husi televizaun, hanesan “Mensájen husi Primeiru Ministru” loron tolu molok loron eleisaun nian, iha 9 de Abril (2ª feira). Programa ne’e hanesan hatudu katak Presidente Gusmão no Igreja Katólika tulun kampaña prezidensial Ramos Horta nian”, Fernandes hatete.

Fernandes hatete katak rezultadu eleisaun ne’e hanesan prova hasoru propaganda ne’ebé oportunistas polítikus no media internasional balu halo ne’ebé dehan katak Timor-Leste fahe ba Loro Sae no Loro Monu.

“Povu la vota tuir Loro Sae ka Loro Monu “, Fernandes hatete. “Tebes katak Lu Olo simu votus barak liu husi distritus Lautém, Baucau no Viqueque husi parte leste. Maibé, Lu Olo moos simu votus barak husi distritus Covalima, Oecussi, Manufahi no Ermera ne’ebé iha parte oeste”.

“Ami husu ema hotu atu labele fahe taan ita nia povu”


Atu hetan taan informasaun, bele dere arame ba:

Jose Manuel Fernandes (Lu Olo ninia reprezentante) (+670) 734 2174(Dili)
Arsénio Bano: (+670) 733 9416 (Dili)
Filomeno Aleixo: (+670) 724 3460 (Dili)
Paulo Araujo (+61) 424 413 525 (Darwin, Australia)