Komunikado Imprensa - Lu Olo komisiu aban iha Dili

FRENTE REVOLUCIONARIA DO TIMOR-LESTE INDEPENDENTE

FRETILIN

Komunikadu ba Imprensa
Loron 3 Fulan Abríl Tinan 2007

Lu Olo komísiu aban iha Dili

Ema-lubun barak liu espetativa 12.500 maka ohin (Tersa-feira) partisipa iha komísiu iha Oecusse atu apoia kandidatu prezidensiál Francisco Guterres Lu Olo pas tempu kampaña mós tama daudauk iha ninia semana finál.

Fretilin-nia kandidatu, Lu Olo, nia kampaña sei mai iha kapitál Dili aban ho komísiu ida iha Kampu Motocross iha Delta-Manleuana, iha parte loromonu Dili nian, dadeer tuku 10. Lu Olo sei hala'o ninia komísiu iha Atauro iha Kinta-feira.

To'o ohin-loron Lu Olo dada ona ema-lubun besik 80.000 (rihun ualu-nulu) – barak liu kualkér kandidatu ida.

Ohin Fretilin agradese ninia apoiante sira tanba hala'o kampaña ida, ne'ebé jerálmente pasífika.

"Ami apela ba ami-nia membru sira atu kontinua kampaña ho pás no mós ignora provokasaun oioin. Ami bolu mós ba partidu polítika sira seluk atu halo apelu públiku hanesan ba sira-nia membru sira," Arsénio Bano, membru Comité Central no Comissão Política Nacional Fretilin nian fó-sai durante konferénsia mídia ida iha Dili.

Bano mós konfirma katak apoiante Fretilin nian kaer tiha mane ida armadu ho "rama Ambon" no entrega tiha nia ba polísia durante Lu Olo-nia komísiu iha Suai Sabadu foin liu ba.

Atu hetan informasaun liután kontakta:
Arsenio Bano: (+670) 733 9416 (Dili)
Jose Manuel Fernandes (Lu Olo-nia reprezentante ofisiál ba eleisaun)
(+670) 734 2174 (Dili)
Filomeno Aleixo: (+670) 724 3460 (Dili)