Tropa Austrália-nian baku militante FRETILIN ida

Horisehik (26/3) bainhira komitiva Prezidente Lu Olo nian fila hosi
kampaña iha Gleno, distritu Ermera, soldadu Austrália-nian baku tiha
militante FRETILIN-nian ida. Soldadu Australianu baku militante
ne'e tanba militante ne'e la husik kareta militár Austrália-nian
tama netik iha kareta komitiva FRETILIN nian, ne'ebé foin fila hosi
Ermera ba Dili.

Tropa Austrália-nian haruka para tiha kareta ne'e, hafoin dada sai
vítima hosi karreta laran no riba nia ba rai. Hafoin, soldadu ida
sama vítima ne'e rabat ba rai no obriga vítima ne'e hodi rei rai.
Vítima ne'e tenta reziste soldadu Austrália ne'e nia halohalok, maibé
soldadu ne'e sé nia kilat-tutun ba vítima-nia ulun no hakilar "Fuck
you! I'll kill you!" ("H**t ó! Ha'u sei oho ó!").

Bainhira Mari Alkatiri (sekretáriu-jerál FRETILIN-nian) nia
seguransa, nia mós membru PNTL ida, tenta atu intervene hodi para
tiha umiliasaun ne'e, soldadu Australianu ne'e sé fali ninia kilat ba
Mari Alkatiri-nia seguransa hanesan ameasa fali nia. Soldadu ne'e só
hakiduk bainhira ninia komandante fó orden ba nia hodi para.

Ema hotu-hotu ne'ebé akompaña komitiva Prezidente Lu Olo-nian haree
hotu insidente ne'e, inklui mós sekretáriu-jerál
FRETILIN-nian, ni seguransa no mos Prezidenti Lu Olo ni seguransa, no mós jornalista sira.

Hahalok sira hanesan ne'e halo ema hodi hanoin filafali soldadu
Australianu-nia motivu loloos iha Timor-Leste ne'e saida? Sira mai
atu asiste Timor-oan sira ka saida?