Komunikadu Imprensa -Lu Olo komprometi hakotu divizaun iha komunidade no promove seguransa

Francisco Guterres Lu Olo ba Prezidente
“Hau se sai Prezidenti Hosi Povu ba Povu Tomak”
Komunikadu ba Imprensa
26 Abril 2007


Lu Olo komprometi hakotu divizaun iha komunidade no promove seguransa


Kandidatu Prezidensial Francisco Guterres “Lu Olo” ohin halao vizita ba kampu deslokadus iha Metinaro no Porto Hera atu ható ninia apoiu no solidaridade ba sira nia súsar.

“Hau la simu situasaun susar neebe deslokadus sira hetan,” nia dehan. “ Horiuluk, ema hakas ita hodi moris ho tauk no ho kiak, bainhira ita sei funu hela ba ita nia ukun rasik a’an, maibé, oras nee, ita mak kaer rasik ita nia futuru. Ita tenke hamutuk atu bele fo tulun ba deslokadus sira hodi fila hikas ba sira nia uma, hodi nunee ita hotu-hotu bele moris ho hakmatek no dame.”

“Atu halo ida ne’e , ita tenke fo tulun ba maluk sira ne’ebé mak lakon sira nia uma, tulun sira atu bele harii sira nia uma fila fali , tuir programa ne’ebé governu hahu tiha ona. Ita tenke tau seguransa iha bairrus Dili nian, no fo proteksaun eh hametin direitu ida-idak nian atu moris iha fatin ne’ebé sira hakarak hela. Ita presiza rezolve problema kona ba rai no uma , ne’ebé sei dauk hatene lolós sé maka nain. Ita presiza halau programas ba ema bele hetan buat ruma ba sira nia moris lor-loron nian. Hau komprometi a’an atu servisu hamutuk ho governu no ONG sira atu hetan buat sira nee.”

“Maibe, importante liliu, ita presiza harii fila fali justisa no seguransa ba ita nia rain, no hametin fila fali estado de direitu. Ita nia forsa rasik mak tenke fo seguransa ba ita, F-FDTL no PNTL, laos Forsa Internasional sira. Nudar Prezidenti, hau nia prioridade uluk liu mak atu fo tulun ba governu, parlamentu, instituisoens judisiaria no forsa seguransa atu hametin fila fali dame iha ita nia rain, hetan fila fali ita nia soberania no lori ba justisa ema hot-hotu ne’ebé halo violénsia hasoru ita nia ema no ita nia rain.”

“Hau hatene katak difísil tebe-tebes atu rezolve deslokadus sira nia problema. Hau hatene katak ema iha kampus deslokadus tauk fila fali ba sira nia uma tamba la iha seguransa . Hau hatene katak susar tebetebes hela iha kampus deslokadus. Nudar aman, hau nia laran taridu tamba hare labarik sira moris iha kondisoens hanesan nee. Hau triste tamba professores sira labele fila fali ba eskolas. Hau triste tamba ema sente deit seguru bainhira forsa sira besik sira. Ita nia seguransa labele depende ba kilat, la’os agora ké ita hetan ona ukun rasik aan ”

“Besik fulan sanulu resin rua kotuk, ema dehan katak se governu troka, problema deslokadus sei resolve. Ida nee la akontese. Primeiru Ministru foun la resolve problema ida nee. Prezidente RDTL, ne’ebé husu Primeiru Ministru foun, la rezolve problema. Sei iha ema hitu nulu rihun mak simu ai han, tamba sira forsadu sai husi sira nia uma. Ema barak tebe-tebes mak tauk fila fali ba sira nia uma. Ema barak tebe-tebes la iha ona uma atu hela.”

“Nudar Prezidenti, hau sei kompromete a’an atu servisu ho ita nian instituisoens hotu-hotu atu hetan solusaun . Atu hametin dame no hakmatek, ita tenke servisu hamutuk ba buat sira ne’ebé hametin liu ta’an ita nia unidade. Hau lakoi buka konflitus ho líder sira seluk atu hamosu ta’an konflitu. Hau sei buka halo ema koalia ba malu, fó hanoin ba malu hodi dezenvolve ita nia rai doben.”

“Ita tenke hakotu koalia kona ba Lorosae no Loromonu tamba haketak ita. Hau sempre tau aas ita nia ideais Resisténsia nian, katak Timor-Leste nasaun ida deit. Ita Povu ida deit, hosi Jaco- Tutuala , liu hosi Atauro to Oecussi, hosi tasi mane to tase feto. Horiuluk ita hamutuk, ohin loron ita hamutuk , aban bai rua ita sei hamutuk nafatin, Povu ida deit moris hó ninia orgullu. . Ita tenke hametin Unidade ba ita nia futuru. Ne’e dever boot ita nian ba maluk hotu hotu ne’ebé mate ba ita nia ukun rasik aan no ita nia soberania.. Hau komprometi a’an sei tau a’as liu ideal Maubere nudar ita nia identidade nasional.”


Hakarak hatene ta’an informasaun, bele dere arame bá:

Harold Moucho (LuOlo nia assessor polítiku) (+670) 723 0048
José Manuel Fernandes (reprezentante Lu Olo nian ba eleisoens) (+670) 734 2174 (Dili)

http://luolobapresidente.blogspot.com, HYPERLINK "http://luolo.blogspot.com" http://luolo.blogspot.com, http://www. timortruth.com