Komunikadu imprensa - LIDERANSA FRETILIN NIAN VIZITA VÍTIMAS VIOLÉNSIA NO HUSU EMA HOTU ATU HAPARA VIOLÉNSIA

FRENTE REVOLUCIONÁRIA DO TIMOR-LESTE INDEPENDENTE
FRETILIN

Komunikadu imprensa
Sexta feira, 6 Abril 2007


LIDERANSA FRETILIN NIAN VIZITA VÍTIMAS VIOLÉNSIA NO HUSU EMA HOTU ATU HAPARA VIOLÉNSIA

FRETILIN husu fila fali ninia militantes no apoiantes rasik no moos ba militantes no apoiantes partidu sira seluk nian atu hapara violénsia molok, bainhira no hafoin eleisoens prezidensiais halao iha Timor-Leste segunda feira oin mai ne’e.

Francisco Guterres “Lu Olo”, Presidente FRETILIN nian no kandidatu FRETILIN nian ba eleisoens prezidensiais hamutuk ho Mari Alkatiri, Sekretáriu Jeral FRETILIN nian, hasai ohin komunikadu ida tatoli katak sira sente laran susar tamba ema barak hetan kanik; laós sente deit hanesan ne’e ba ema FRETILIN nian, maibé, ba ema hotu hotu ne’ebé hetan kanik.

Hafoin líderes FRETILIN nian vizita tiha vítimas violénsia iha Hospital Nasional Guido Valadares, partidu FRETILIN husu ba ninia militantes no apoiantes atu hakás a’an ba hakmatek ho laran malirin, katak labele hassoru violénsia hó violénsia.

Tuir deklarasaun ne’e, hahú iha quarta feira liu ba ne’e, apoiantes besik haat nulu maka tama ospital Dili nian, Gleno no Baucau.

“Ami fiar katak apoiantes partidu sira seluk nian moos sai vítimas violénsia. Ami sente laran susar tamba buat sira ne’e akontese ba sira no ami hein katak sira sei diak lalais”. “Ami kondena violénsia ba se-sé deit, ba ema partidu FRETILIN nian ka ba partidu sira seluk nia ema ka ema independente.

Militantes FRETILIN nian hatudu sira ninia maturidade liu fulan sanulu ona tamba hatán violénsia hó maturidade no haka’na sira nia a’an ba hakmatek. Ami sei tuir nafatin dalan ida ne’e. Ema sira ne’ebé uza violénsia lakoi demokrasia, tamba ne’e, sira la respeita regras”. Ohin, Mari Alkatiri, Sekretáriu-Jeral FRETILIN nian, no Estanislau da Silva, membru Komisaun Polítika Nasional FRETILIN nian no Vise Primeiru-Ministru vizita vítimas violénsia nian, iha Hospital Nasional Guido Valadares. Sira hatete katak partidu sei fó asisténsia ba apoiantes FRETILIN nian ne’ebé sai vítimas. Oan kosok ida, Jessica Quintão Lima, fulan ualo, mo’os hetan kanik todan iha ulun bainhira ema tuda apoiantes FRETILIN nian, quarta feira kotuk, iha heliporto. Jessica sai tiha ona husi sala kuidadus intensivus; doutór sira dehan katak família bele lori nia ba halu tratamentu iha liur bainhira nia didiak uituan liu ta’an ba sai aviaun.

Delegasaun FRETILIN nian hetan malu ho Daniel de Deus Maia, nebé ema hana ho “Rama Ambon” iha Gleno bainhira sira fila fali ba uma, kuarta feira kotuk, hafoin asiste komísiu iha Dili. Vítima seluk ida ta’an , Ermera oan ida, Jacinto de Jesus, sei iha sala kuidadus intensivus tamba kanik todan. Tuir informasaun simu ohin lokraik, hamutuk hotu vítimas 38 maka hetan kanik iha Gleno tamba ema tuda fatuk ka hana sira ho “rama Ambon”.


Hakarak hatene ta’an informasaun, bele dere arame ba:

José Mnauel Fernandes ( representante ofisial Lu Olo nian ( +670) 734 2174 (Dili)
Harold Moucho (Konselleiru polítiku) (+670) 725 2016 (Dili)
Mari Alkatiri (+670) 733 2360 (Dili)
Estanislau da Silva (670) 733 5062 (Dili)
Arsénio Bano (+670) 733 9416 (Dili)
Paulo Araújo (+61) 424 413 525 (Darwin, Australia)